Ölü ürək

Kimyaçı Artyom Vasilyev xərçəng xəstəliyinə qarşı xüsusi dərman hazırlayır. Lakin naməlum şəxslər onun laboratoriyasını yandırırlar. Hadisə nəticəsində alimin həyat yoldaşı həlak olur, oğlu yoxa çıxır və bütün tədqiqat sənədləri məhv edilir. Müstəntiqlər isə baş verən cinayətdə və qətldə məhz Artyomun özündən şübhələnməyə başlayırlar.

Vasilyevi həbsdən yalnız yanğını törədən keçmiş hərbi kimyaçı Fyodor Paşninin tutulması xilas edir. Xəsarət alan şübhəli xəstəxanaya yerləşdirilir və Artyom qisas almaq məqsədilə gizlicə onun palatasına daxil olur. Həmin an ora Paşnini öldürmək üçün gələn qatil peyda olur. Qatilin qarşısını alaraq düşmənini xilas edən Artyom gözlənilməz xəbər alır: onun oğlu sağdır və uşağın yerini yalnız Paşnin bilir.

«Ölü ürək» (Mertvoe serdtse) serialı 2014-cü ildə rejissor Artur Rumınski tərəfindən çəkilib. Rusiyanın istehsalı olan bu kriminal melodramda baş rolları Mixail Yevlanov, Yevgeni Volovenko, Mariya Quzeyeva və Mariya Kireyeva canlandırıblar.