Vinter

Sidneyin Kinqs-Kross bölgəsində İndiana Houp adlı gənc qadını avtomobil vurur və o, xəstəxanaya düşür. Həmin gecə balıqçı qəsəbəsi olan Roki-Poyntda qayalıqların üzərində başqa bir qadının — iki uşaq anası Karli Yohansenin cansız bədəni aşkarlanır.

Cinayətin təhqiqatına detektiv Eva Vinter başlayır. Onun həmkarı serjant Laklan Makkenzi bu hadisə ilə səkkiz il əvvəl törədilmiş bənzər qətl arasında əlaqə olduğunu güman edir. Məlum olanda ki, qəzaya düşən İndiana ilə qətlə yetirilən Karli uşaqlıqdan birgə böyüyən rəfiqələrdir və hadisədən əvvəl bütün axşamı birlikdə danışıblar, araşdırma daha da mürəkkəbləşir.

Avstraliya istehsalı olan «Vinter» kriminal serialı 2015-ci ildə ekranlara çıxıb. Ekran əsərinin rejissorluğunu Şirli Barret və Linn Heqarti edib, baş rolları isə Rebekka Qibni, Piter O'Brayen, Metyu Neybl və Antoniya Prebbl canlandırıb.