Qəddar şəhər

Hadisələr 1982-ci ildə, gecə əyləncələrinin və rok musiqisinin çiçəkləndiyi Los-Ancelesdə cərəyan edir. Məşhur Sanset Strip küçəsində Kent Qreynder adlı qəddar qatil peyda olur. O, əyləncə məkanlarında qadınlarla tanış olur, onları maşını ilə kimsəsiz ərazilərə apararaq qətlə yetirir və cəsədlərini hamının görə biləcəyi yerlərdə qoyur. Cinayətkar hər hücumdan əvvəl radiostansiyaya zəng edərək növbəti qurbanının adına mahnı sifariş verməklə özünəməxsus iz qoyur.

Şəhərdə qurbanların sayı artdıqca xəfiyyələr yerli jurnalistlər, gecə klublarının daimi qonaqları və narkotik alverçiləri ilə əlbir olub canini axtarmağa başlayırlar. Bu ərəfədə Kent iki uşaq anası olan tibb bacısı Betti Bomontu hədəf seçir, lakin ona qarşı gözlənilməz hisslər keçirərək qadını sağ buraxır. Zaman keçdikcə onların arasında yaranan münasibət Bettini qatilin ortağına çevirir.

«Wicked City» adlı kriminal dram serialı 2015-ci ildə ABŞ-da istehsal olunub. Layihənin rejissorluğunu Con Kassar və Con Emiel həyata keçirib. Əsas rolları Ceremi Sisto, Taissa Farmiqa, Qabriel Luna və Ceymi Rey Nyuman canlandırır.