Biz sizə müharibə elan edirik

Ali məktəbi yenicə bitirmiş Alyona Aralıq dənizi sahilindəki ölkələrdən birinə təcrübə keçməyə yollanır və tezliklə orada müəmmalı şəkildə həyatını itirir. Rəsmi qurumlar bunun bədbəxt hadisə olduğunu iddia edir. Lakin qızın Əfqanıstan müharibəsi veteranı olan atası Anatoli və Çeçenistanda döyüşmüş əri Nikolay bu versiyaya inanmayaraq həqiqəti tapmağa qərar verirlər.

Öz araşdırmalarına başlayan kişilər Alyonanın zorakılıqla qətlə yetirildiyini öyrənirlər. Üstəlik, məlum olur ki, qızın xaricdə Nikolayın xəbəri olmadığı bir övladı dünyaya gəlib. İzlər rus mafiyası tərəfindən idarə olunan, narkotik alveri aparılan və qadınların zorla saxlandığı gecə klubuna aparıb çıxarır. İki veteran həm cinayətkarları tapmaq, həm də körpəni xilas etmək üçün təhlükəli mübarizəyə qoşulur.

2011-ci ildə çəkilmiş «Biz sizə müharibə elan edirik» kriminal serialı Rusiyanın istehsalıdır. Layihənin rejissoru İqor Xolodkovdur. Əsas obrazları Leonti Piçuqin, Vladimir Yumatov, Marina Bleyk və Andrey Lebedev canlandırıblar.