Köçəri quşlar

Latviya ilə sərhəd yaxınlığındakı qəsəbədə yaşayan və Qudini ləqəbi ilə tanınan qapalı bir adam insanları gizli yollarla Avropaya keçirməklə məşğuldur. Sərhədçilərdən yayınaraq hərəkət edən bələdçi üçün müştərinin kimliyi önəm kəsb etmir. Qaçqınlar, cinayətkarlar və ya səfillər fərq qoyulmadan onun köməyi ilə sərhədi aşırlar. Heç kim bu adamın keçmişi və bu işi niyə seçdiyi barədə heç nə bilmir, lakin hamı onun hər zaman sözünün üstündə durduğuna əmindir.

Növbəti tapşırıq Qudininin həyatını dəyişir. O, Maşa adlı kimsəsiz qızcığazı sərhəddən keçirməli olur. Çox keçmədən bəlli olur ki, cinayətkarlar uşağı orqan alveri məqsədilə axtarırlar. Nəticədə iki tənha insan təhlükəli bir cinayət şəbəkəsinin hədəfinə çevrilir.

«Köçəri quşlar» adlı kriminal serial rejissor Boqdan Drobyazko tərəfindən çəkilib. 2014-cü ildə Ukraynada istehsal olunmuş layihədə baş rolları İlya Şakunov, Kristina Babuşkina, İqor Savoçkin və Andrey Mejulis canlandırıblar.