Labirint

Varlı iş adamı Otasiliu Martinş Fraqa Yeni il şənliyi zamanı qətlə yetirilir. Onun keçmiş model olan arvadı Leonor həyat yoldaşına xəyanət edirdi. Leonor və sevgilisi Rikardu cinayət silahını dəyişdirərək şübhələri şirkət işçisi Andre üzərinə yönəldirlər. Həbs olunmaq istəməyən Andre qaçır və adını təmizə çıxarmaq üçün əsl günahkarları ifşa etməyə çalışır.

Ona kömək etmək üçün dostu Junior, Juniorun nişanlısı Virjiniya və Paula Li adlı çağırış qızı birləşirlər. Andre ilə Virjiniya arasında yaranan yaxınlıq qızın anasını bərk narahat edir, çünki qadın ailənin borclarını Juniorun sərvəti ilə ödəmək niyyətindədir. Eyni zamanda izinə düşən polislərdən əlavə, Rikardu da izləri itirmək üçün Andreni öldürtmək qərarına gəlir. Həqiqəti tapmaq istəyən Paula Rikardu ilə evlənərək onun evində sübut axtarmağı planlaşdırır, lakin Rikardu bu hiyləni vaxtında sezir.

«Labirint» serialı 1998-ci ildə Braziliyada çəkilmiş triller və kriminal layihədir. Serialın rejissor kürsüsündə Dennis Karvalyu və Mario Marsio Bandarra əyləşiblər. Əsas rolları Malu Mader, Antonio Faqundes, Fabiu Asunsan və Betti Fariya canlandırırlar.