Qrafinya de Monsoro

On altıncı əsrin sonlarında Fransada Üçüncü Henrixin səltənəti dövründə böyük siyasi çəkişmələr baş verir. Nüfuzlu Gizlər ailəsi taxta kralın qardaşı Anju hersoqunu çıxarmaq niyyətindədir. Sarayda baş verən bütün bu gizli planlardan və təhlükəli intriqalardan isə yalnız zəkası ilə seçilən kral təlxəyi Şiko xəbərdardır.

Anju hersoqunun tərəfdarı və mahir qılıncoynadan qraf de Büssi kralın yaxın adamları ilə döyüşdə ağır yaralanır. Yad bir evdə özünə gələn cəngavər qarşısında gənc bir qadın görür və yenidən huşunu itirir. Sonradan hersoq Büssidən maraqlandığı bir xanımı tapmağı xahiş edir. Axtarışlar nəticəsində Büssi həmin qadının onu xilas edən sirli gözəl Diana olduğunu, lakin onun artıq qəddar qraf de Monsoro ilə evləndiyini öyrənir.

Fransa istehsalı olan macəra və dram janrlı «La dame de Monsoreau» serialı 1971-ci ildə ekranlara çıxıb. Çoxseriyalı filmin rejissoru Yannik Andreidir. Əsas obrazları Karin Petersen, Nikolya Zilber, Deni Manüel və Mişel Kreton canlandırıblar.