Turist

Həyatlarında çətin dövr yaşayan üç yapon qadın vəziyyəti dəyişmək üçün Asiyanın Banqkok, Hoşimin və Taybey kimi müxtəlif şəhərlərinə yollanır. İlk hekayənin qəhrəmanı işində və şəxsi həyatında problemlərlə üzləşən televiziya prodüseri Satsuki Noqamidir. Taylandın paytaxtına gələn qadın burada küçə oğrularının Makoto Ameku adlı yapon gəncinin bütün pulunu və sənədlərini oğurlamasına şahid olur.

Satsuki həmyerlisinə kömək etmək qərarına gəlir və onun bütün xərclərini öz üzərinə götürür. Bunun müqabilində gəncdən bircə gün onunla vaxt keçirməsini və yad şəhərdə yoldaşlıq etməsini istəyir. Bu sirli səyyahla təsadüfi tanışlıq digər seriyalardakı qəhrəmanların da həyatına birbaşa təsir göstərir.

2018-ci il istehsalı olan «Turist» serialı Yaponiya rejissorları Hiroto Totsuka və Smith tərəfindən çəkilib. Əsas rolları Haruma Miura, Asami Mizukawa, Elaiza Ikeda və Machiko Ono canlandırır. Mini-serial ümumi bir personajla bağlanan üç fərqli hekayədən ibarətdir.