İkiillik tətil

«Deux ans de vacances» («İkiillik tətil») macəra serialı Oklend pansionlarından birində təhsil alan gənc zadəganın hekayəsindən bəhs edir. Günlərin birində o, ingilis lordu olan əmisi ilə tanış olur. Ziyalı qohum gəncin yay istirahətini maraqlı etmək məqsədilə ona və bir neçə məktəb yoldaşına unudulmaz hədiyyə hazırlayır.

Uşaqlar lordun şəxsi yaxtasında dəniz səyahətinə yollanırlar. Gəminin sahibinin tapşırığına əsasən, heyət üzvləri bu gənc səyyahların hər bir sözünə qulaq asmalı və onların əmrlərini yerinə yetirməlidir. Beləliklə, dəniz suları üzərində başlayan bu gəzinti yeniyetmələr üçün gözlənilməz sınaqlar və hadisələrlə dolu bir macəraya çevrilir.

Jül Vernin eyniadlı romanı əsasında çəkilmiş serial 1974-cü ildə Fransa, İsveçrə, Rumıniya, Belçika və AFR tərəfindən birgə istehsal olunub. Ekran əsərinin quruluşçu rejissoru Jil Qranjyedir, əsas rolları isə Franz Seidenschwan, Mark Di Napoli, Dominique Planchot və Didier Gaudron ifa edirlər.