Sevgi tənlikləri

Zhou Xiao universitetə daxil olaraq Çin dili və ədəbiyyatı fakültəsində təhsil almağa başlayır. Ədəbiyyat vurğunu olan qız boş vaxtlarında detektiv əsərlər oxuyur və özü də bu janrda hekayələr qələmə alır. Lakin təhsil ocağına qədəm qoyduğu ilk gün çaşqınlıq yaşayaraq yolu itirir və birinci kurs tələbələrini qarşılamaqla vəzifələndirilmiş Zhao Fanzhounun işini xeyli çətinləşdirir.

Zhao Fanzhou məhkəmə-tibbi ekspertiza ixtisası üzrə təhsil alan, yalnız elmə yönəlmiş təmkinli bir gəncdir. Qızın yaratdığı narahatlıq və xarakterlərinin kəskin fərqliliyi aralarında ilk başda soyuqluq yaratsa da, kampus daxilindəki davamlı təsadüflər hər şeyi dəyişir. Bir-birinə bənzəməyən bu iki tələbə getdikcə bir-birinə qarşı dərin maraq hiss etməyə başlayır.

«Zhi wo men tian tian de xiao mei hao» adlı Çin istehsalı olan melodram serialı 2020-ci ildə işıq üzü görüb. Ekran əsərinin quruluşçu rejissoru Xing Xiaodur. Əsas obrazları Gong Jun, Yongchang An, Gao Qiuzi və Li Geyang canlandırıblar.