Təsadüfi gəlin

Təcili yardım həkimi Anastasiya peşəsi gərəyi ən çətin anlarda belə təmkinini qorumağı bacarır. Xeyirxahlığı ilə seçilən bu gənc qadın növbəti çağırış zamanı böyük tikinti şirkətinin rəhbəri Mark Knyazevin evinə yollanır. Orada Sergey İqnatyevlə tanış olur və qısa müddətdə ona güclü hisslər bəsləməyə başlayır.

Sergey diqqəti, gül-çiçəyi və hədiyyələri ilə Anastasiyanı valeh edir və cəmi bir həftədən sonra ona evlilik təklifi irəli sürür. Həyatının sevgisini tapdığını zənn edən qızın sevinci uzun çəkmir. Təsadüfən qulaq şahidi olduğu bir söhbət onun bütün təsəvvürlərini alt-üst edir. İndi o, təhlükəli adaxlısından qaçmaq və ya xoşbəxt gəlin rolunu oynamağa davam etmək arasında qalır.

2018-ci ildə Rusiyada çəkilmiş «Təsadüfi gəlin» («Случайная невеста») serialının rejissoru Mariya Kravçenkodur. Ekran işində əsas rolları Lyubava Qreşnova, Konstantin Solovyov, Anton Makarski və Petar Zekavitsa canlandırıb.