Səni xatırlayarkən

On yeddi illik evlilikdən və çoxdan arzuladıqları yeni evə köçdükdən sonra Lyudmila ilə Andrey iki uşaq böyüdərək xoşbəxt həyat sürürlər. Lakin Andreyin növbəti ezamiyyəti faciə ilə nəticələnir: o, qəfil yoxa çıxır. Xəstəxana və polis axtarışları heç bir fayda vermir. İki il boyunca ümidini itirməyən Lyudmila ərinin yaxın dostu Viktorun diqqətini rədd edir. Bir gün o, sosial şəbəkələrdə yaddaşını itirmiş Andreyin öz kimliyi haqqında məlumat axtardığı elanla qarşılaşır.

Əri evə qayıtsa da, doğmalarını tanıya bilmir və ailəsinə yad insan kimi baxır. O, nə həyat yoldaşını, nə də uşaqlarını xatırlayır. Doğmaları Andreyin yaddaşını oyatmaq və onun iki il əvvəlki qəfil yoxluğunun arxasında kimin dayandığını öyrənmək üçün çətin sınaqlarla üz-üzə qalırlar.

Rusiyanın «Səni xatırlayarkən» («Vspominaya tebya») melodram serialı 2019-cu ildə işıq üzü görüb. Ekran əsərinin rejissoru Aleksandr Vısokovskidir. Əsas obrazları Yelena Arosyeva, İqor Teplov, Artyom Osipov və Vsevolod Volodin canlandırıblar.