Nika

«Nika» serialının baş qəhrəmanı həyat yoldaşının qurduğu tələ nəticəsində dəmir barmaqlıqlar arxasına düşür. Həbsxanada o, seyf qıran Cenni ilə tanış olur və qadınlar qısa müddətdə yaxın dostlaşırlar. İki ildən sonra azadlığa çıxan Cenni rəfiqəsinin evini geri almağa və onun ərini cəzalandırmağa kömək etməyi qərara alır.

Tezliklə onlara Cenninin fırıldaqçılıqla məşğul olan qardaşı Den də qoşulur. Üç gənc müasir Robin Qudlara çevrilərək haqsızlıqlarla mübarizəyə başlayırlar. Onlar ölüm ayağında olan bir qızcığazı xilas edir, rüşvətxor həkimi ifşa edir, cinayətkar iş adamının qarşısını alır və aldadılmış qocaların hüquqlarını müdafiə edirlər.

Melodram janrında çəkilmiş Rusiya istehsalı olan layihənin rejissoru Valentin Donskovdur. 2015-ci ildə işıq üzü görən serialda əsas obrazları Anna Mikloş, Sergey Çirkov, Natali Starınkeviç və İlya Kovrijnıx canlandırıblar.