Xoşbəxtliyin açarları

Gənc Tanya Minina içki aludəçisi olan anasından və aciz atasından uzaqlaşaraq kənd həyatından qurtulmaq arzusundadır. Yerli gənclərin elçiliyini rədd edən qız şəhərdən gələcək varlı bir insanla ailə qurmağa ümid bəsləyir. Çox keçmədən kəndə imkanlı iş adamı Viktor gəlir və Tanyanı məktəbi bitirməyə belə imkan vermədən şəhərə aparır. Lakin bir müddət sonra Viktorun əsl niyyəti üzə çıxır: o, yalnız sağlam bir qadından varis dünyaya gətirmək istəyirdi. Oğlan uşağı doğulduqdan sonra kişi körpəni zorla anasından alaraq boşanmaq qərarına gəlir.

Övladını geri qaytarmaq istəyən Tanya təhdid və zorakılıqla üzləşir, nəticədə Moskvaya qaçmaq məcburiyyətində qalır. Yolda Fyodor adlı yük maşını sürücüsü ilə tanış olur və sürücü ona bir vaxtlar özünə uğur gətirmiş kiçik açar şəklində talisman bağışlayır. İllər sonra məşhur müğənniyə çevrilən qadın oğlunu tapmaq ümidi ilə geri qayıdır, lakin artıq müflis olmuş və içkiyə qurşanmış keçmiş əri uşağın çoxdan evdən qaçdığını bildirir.

2008-ci ildə nümayiş olunmuş «Xoşbəxtliyin açarları» («Ключи от счастья») Rusiya istehsalı olan melodram serialıdır və 2 mövsümdən ibarətdir. Ekran işinin rejissoru Roman Prosvirnindir. Baş rolları Natalya Terexova, Konstantin Solovyov, Konstantin Yuşkeviç və Anna Osipova canlandırıblar.