Hamiləlik testi

Təcrübəli mama-ginekoloq Natalya Baxmetyeva elmi-tibbi mərkəzin mamalıq şöbəsinə rəhbər təyin olunur. İşin ilk günündən etibarən o, tibbi bacarığı ilə həmkarlarının rəğbətini qazansa da, sərt və tələbkar rəftarı narazılıq doğurur. Ətrafındakı söz-söhbətlərə fikir verməyən Natalya hər kəsdən məsafə saxlayır. Bu cür qapalı həyat tərzi onun keçmiş elmi rəhbəri, yüksək vəzifəli Yuri Kolmoqorovla uzun illər davam edən gizli münasibətlərinin nəticəsidir.

Kişinin ailəsindən ayrılmayacağını anlayan həkim bu sevgiyə son qoyaraq başqa ünvana köçür və yeni işə başlayır. Lakin çox keçmədən Natalya keçmiş sevgilisindən hamilə qaldığını öyrənir. Hər gün digər qadınların ana olmasına kömək edən və pasiyentlərinə dəstək verən həkim indi öz körpəsini dünyaya gətirib-gətirməmək qərarı ilə üz-üzə qalır.

Rusiyanın «Hamiləlik testi» adlı melodram serialı 2014-cü ildə yayımlanıb və layihə 4 mövsümdən ibarətdir. Ekran əsərinin quruluşçu rejissorları Mixail Vaynberq və Vladimir Şevelkovdur. Baş rolları Svetlana İvanova, Kirill Qrebenşikov, Danila Dunayev və Anna Kamenkova canlandırıb.