Anjelika

Kuban qəsəbəsinin ən gözəl qızı olan Anjelika toy ərəfəsindədir və gələcəyinin ancaq xoşbəxtlik gətirəcəyinə inanır. Ətrafdakılar onun gözəlliyinə və bəxtinə həsəd aparır. Lakin toya bir həftə qalmış qəsəbəyə gələn musiqiçilər hiylə ilə qızı maşına salıb zorlayır, sonra isə aradan çıxırlar.

Bu hadisədən sonra nişanlısı və rəfiqələri ondan üz döndərir, kənd sakinləri isə onu lağa qoymağa başlayır. Tezliklə hamilə olduğunu öyrənən Anjelika uşağı dünyaya gətirir və təhqir edənləri tapıb qisas almaq məqsədilə Moskvaya yollanır. Böyük şəhərdə onu cinayətkar qrupların oyunları, yeni xəyanətlər və çətin sınaqlar gözləyir.

2010-cu ildə çəkilmiş «Anjelika» serialının rejissoru Roman Prosvirnindir. Rusiyada istehsal olunmuş melodramda baş rolları Olqa Pavlovets, Aleksey Makarov, İrina Rozanova və Aleksandr Paşkov canlandırıb.