Была тебе любимая…

Pavel Qromov Rusiya elmi-tədqiqat gəmisində kapitanın baş köməkçisi vəzifəsində çalışır. Ondan uşaq gözləyən sevgilisi Lena da səfərlərdə onun yanındadır və cütlük ekspedisiya bitən kimi ailə qurmağı planlaşdırır. Lakin Pavellə dostluq edən gəminin baş mexaniki Qleb də uzun müddətdir ki, gizlicə Lenaya aşiqdir. Qəfil Somali quldurlarının hücumundan istifadə edən Qleb rəqibindən qurtulmaq qərarına gəlir, Paveli arxadan vuraraq dənizə atır.

İtkinin acısını yaşayan Lena doğulacaq övladının gələcəyini düşünmək məcburiyyətində qalır. Belə bir vəziyyətdə Qleb ona evlilik təklifi edir və Lena istəməsə də bu izdivaca razılıq verir. Aradan bir il keçdikdən sonra məlum olur ki, piratların əsirliyinə düşən Pavel təsadüfən sağ qalıb və vətəninə qayıdıb.

2011-ci il istehsalı olan «Была тебе любимая…» melodram serialı Rusiyada lentə alınıb. Layihənin rejissoru Aleksandr Kiriyenkodur. Baş rolları İrina Tarannik, Andrey Çadov, Nikolay Maçulski və Nina Kurpyakova canlandırıblar.