Səni heç kimə vermərəm

Svetlana uğurlu pianoçu idi və ailə həyatından zövq alırdı, lakin əllərindən aldığı ciddi zədə onun musiqi fəaliyyətinə son qoydu. Ağır psixoloji vəziyyətdən çıxmaqda ona avtobus sürücüsü olan əri Aleksandr dəstək olurdu. Lakin Aleksandrın öz həyatı da dolaşıq idi: həm arvadı, həm də konduktor Rita ondan körpə gözləyirdi. Gərginlik ucbatından diqqətini itirən kişi yolda qəza törədib həbsxanaya düşür, Svetlana isə doğuş zamanı uşağını itirir.

Bir müddət sonra qadın qapısının ağzında bir aylıq körpə tapır — bu qızcığaz Rita ilə Aleksandrın övladı idi. Körpəni xilas yolu sayan Svetlana ucqar bir kəndə köçür və növbəti beş ili orada keçirir: poçtda işləyir və Əfqanıstan müharibəsi veteranına musiqi dərsləri verir. Şagirdi ona aşiq olduğu bir vaxtda cəzasını çəkib azadlığa çıxan Aleksandr kəndə gəlib çıxır.

«Səni heç kimə vermərəm» melodram serialı rejissor Vladimir Yanoşuk tərəfindən lentə alınıb. Rusiya və Ukraynanın birgə istehsalı olan bu ekran əsəri 2010-cu ildə işıq üzü görüb. Əsas rollarda Marina Aleksandrova, Aqniya Kuznetsova, Anatoli Paşinin və Yevgeni Pronin çəkiliblər.