Arina

Evdar qadın Arina Zaxarovanın bütün günləri məişət qayğıları ilə keçir. Əri Vasili ona heç bir dəyər verməsə də, Arina bu vəziyyətə dözməkdən başqa yolu olmadığını düşünür. Cütlüyün yol qəzasına düşərək kənarda dayanmış başqa bir maşını əzməsi hər şeyi alt-üst edir.

Yaranmış borcu ödəmək məcburiyyətində qalan Arina iş adamı Maksim Kalininin mülkündə qulluqçu kimi çalışmağa başlayır. O, təkcə ev işlərində deyil, həm də iş məsələlərində Maksimə dəstək verərək onun vacib bir müqavilə bağlamasına kömək edir. Xanımının müdiri ilə yaxınlaşması Vasilidə qısqanclıq doğurur və sonsuz ittihamlardan təngə gələn qadın boşanma qərarı verir. Lakin yeni yola çıxmaq istəyən Arinanın qarşısında keçmiş ərinin inadkarlığı dayanır.

«Arina» adlı Rusiya istehsalı melodram serialı 2024-cü ildə rejissor Dmitri Maqonov tərəfindən çəkilib. Əsas obrazları Anna Sokoloviç, Mixail Bondaruk, Bojena Jarina və Aleksey Anişşenko canlandırıblar.