Unudulmuş sevgi

Memar ər-arvadın ailə həyatında çətin günlər başlayır. Nadejda və Andrey maddi sıxıntılar, işsizlik və uşaq sahibi ola bilməmək problemi ilə üzləşirlər, üstəlik kişinin xəstə anasına baxmaq üçün də ciddi vəsait lazımdır. Həmin ərəfədə şəhərə onların tələbəlik yoldaşı, vaxtilə Nadyanın sevgilisi olmuş Kirill gəlir. Uğurlu iş adamı olan Kirill burada iri ticarət mərkəzinin inşasını planlaşdırır.

O, çətin vəziyyətdə olan cütlüyə sərfəli iş təklifi irəli sürür. Nadejdaya tikintiyə rəhbərlik edən şirkətə başçılıq etməyi, Andreyə isə layihənin baş dizayneri olmağı tapşırır. Ailə bu təkliflə razılaşır, lakin Kirillin gizli niyyətindən xəbərsiz qalır. Əslində isə o, on beş il əvvəl başqasını seçdiyinə görə Nadyadan qisas almaq məqsədi güdür.

2024-cü ilin Rusiya istehsalı olan «Unudulmuş sevgi» («Zabytaya lyubov») serialının rejissoru Valeri İbrahimovdur. Melodram janrında çəkilən layihədə baş rolları Stefaniya Lebedeva, Samvel Mujikyan, Dmitri Muraşev və Kira Kaufman canlandırıblar.