Kukukalar

Anasının yeni münasibəti ucbatından küçədə qalan gənc Katya təkbaşına ayaqda qalmağa məcbur olur. O, xəyalının ardınca gedərək təyyarə bələdçisi olmaq üçün aviasiya texnikumuna daxil olur. Lakin Alekseylə tanışlıq onun bütün planlarını alt-üst edir: hamilə qalan və körpəsi doğulduqdan sonra kimsəsiz qalan qız çətinliklərə dözməyərək uşağından imtina edir.

Bir müddət sonra Katya təhsilini tamamlayır və arzuladığı peşəyə yiyələnir. Lakin gözlənilməz bir təsadüf onu on il müddətinə həbsxanaya salır. Dəmir barmaqlıqlar arxasında keçən illər boyu qızını xatırlayan qadın azadlığa çıxdıqdan sonra övladlığa götürən ailəni axtarıb tapır və uşağın öldüyünü öyrənir.

2023-cü il istehsalı olan «Kukukalar» Rusiyanın melodram serialıdır. Layihənin quruluşçu rejissoru Yuri Popoviçdir. Əsas rollarda Svetlana Smirnova-Katsaqadjiyeva, Konstantin Solovyov, Artyom Qriqoryev və Ulyana Plaşevskaya çəkiliblər.