Mişel

Gənc qız heç vaxt görmədiyi atasının xatirinə bu cür qeyri-adi ad daşıyır. Toy ərəfəsində etmədiyi bir qarətdə ittiham olunaraq həbs edilən ata ailəsindən uzaq düşmüş, anası isə qızını tək böyütməli olmuşdu. Qadın övladının eyni aqibəti yaşamaması üçün əlindən gələni etsə də, tale təkrarlanır: qızın nişanlısı da toydan bir qədər əvvəl qətl ittihamı ilə dəmir barmaqlıqlar arxasına düşür.

Çarəsiz qalan ana onu Moskvaya, köhnə qonşusu Emmanın yanına göndərmək qərarına gəlir. Paytaxta köçən saf əyalət qızı burada çox səmimi qarşılanır, Emmanın şirkətində qısa müddətdə vəzifə pillələrində irəliləyir və hətta onun oğlu ilə nişanlanır. Lakin gənc qız başına gələn bütün bu xoş hadisələrin əslində əvvəlcədən düşünülmüş gizli bir planın hissəsi olduğundan xəbərsizdir.

2018-ci il istehsalı olan «Mişel» serialı Rusiyada melodrama janrında çəkilib. Layihənin quruluşçu rejissoru Olqa Perunovskayadır, əsas rolları isə Arina Postnikova, Aleksey Demidov, Yevgeniya Noxrina və Olqa Sizova ifa edirlər.