Xoşbəxtlik xülyası

Tələbə Alyona Kuznetsova nağıllara və şahzadələrə heç vaxt inanmırdı. Lakin Yuri ilə tanışlıq onun fikirlərini tamamilə dəyişir və gənc qız ona dəlicəsinə vurulur. Ehtiraslı münasibətlər qəfil bitir: Yuri onu tərk edir. Sevgiyə inamını itirən Alyona etibarlı tələbə yoldaşının evlilik təklifini qəbul edir. O, ərini və onun əlil arabasına məhkum olan qızını sevməyə çalışaraq dinc həyat qurmaq qərarına gəlir.

İllər keçsə də, Alyona ilk məhəbbətini unuda bilmir. Yuri ilə yenidən qarşılaşanda o, həyat yoldaşına xəyanət edir və hər şeyin gizli qalacağını düşünür. Lakin hadisələr qadının planlaşdırdığı kimi getmir və gözlənilməz istiqamət alır.

«Xoşbəxtlik xülyası» adlı Rusiya istehsalı melodram serialı 2013-cü ildə çəkilib. Layihənin rejissoru Aleksey Karelindir. Əsas rolları Marina Denisova, Oleq Almazov, Stanislav Bondarenko və Anatoli Lobotski ifa ediblər.