Yastıqdakı göz yaşları

Məktəbi bitirdikdən on beş il sonra üç köhnə rəfiqə — Valya, Nataşa və Tanya məzunların görüşündə bir araya gəlirlər. Kənardan baxanda hər birinin həyatı uğurlu görünür. Valya model agentliyinin sahibidir, Nataşa qənnadı fabrikinə rəhbərlik edir, rəssam Tanya isə yeni rəsm sərgisinə hazırlaşır. Sinif yoldaşlarının qarşısında onlar problemsiz və firavan qadın təsiri bağışlayırlar.

Lakin evə qayıtdıqda hər biri təklikdə göz yaşı tökərək əsl reallıqla üzləşir. Şəxsi həyatlarındakı çətinlikləri daha gizlətmək istəməyən qadınlar Nataşanın valideynlərinin evində yenidən toplaşaraq dərdlərini bölüşürlər. Artıq uşaqlıq xəyallarını deyil, düşdükləri ağır vəziyyətdən necə çıxacaqlarını düşünən rəfiqələr bir-birinə dəstək olmaq üçün ortaq planlar qururlar.

«Yastıqdakı göz yaşları» («Слёзы на подушке») melodram serialı 2016-cı ildə Rusiyada çəkilib. Ekran əsərinin rejissoru Dmitri Sorokindir, baş rolları isə Marina Denisova, Nataliya Soldatova, Aleksandr Pavlov və Yelena Stetsenko canlandırıblar.