Kritik yaş

Məktəb illərindən bəri möhkəm dostluq edən Alyona, Nataşa və Marina hər zaman bir-birinə arxa durmağa vərdiş ediblər. Lakin gözlənilməz sınaqlar hər üçünün həyatını sarsıdır. Ədəbiyyat müəlliməsi olan utancaq Alyona tək böyütdüyü oğlu Kostya evləndikdən sonra doğma mənzilindən çıxarılır. İyirmi ildir xoşbəxt ailə qurduğunu zənn edən rieltor Nataşa ərinin xəyanətinin şahidi olur. Enerjili Marina isə kiçik bir mənzildə tək iti ilə yaşayır və heç vaxt ailə qurmayıb.

Taleyin gedişatını dəyişmək istəyən rəfiqələr şəxsi həyatlarını yenidən qurmaq qərarına gəlirlər. Onlar xoşbəxtlik axtarışında tanışlıq saytında qeydiyyatdan keçirlər. «Kritik yaş» melodram serialı qadınların bu axtarışlar fonunda üzləşdiyi hadisələrdən bəhs edir.

Rusiya istehsalı olan layihə 2019-cu ildə rejissor Yuri Leyzerov tərəfindən çəkilib. Ekran işində əsas rolları Natalya Seliverstova, Alyona Kozıreva, Natalya Şukina və Maksim Bityukov canlandırıb.