Şimal şahzadəsi

Moskva Dövlət Universitetinin aspirantı Vika Vasilyeva ərəb ölkəsi Əcəharın tarixi və mədəniyyətini dərindən araşdırır. İndiyə qədər kitablarla kifayətlənən gənc qadın heç vaxt bu yerlərdə olmayıb. Günlərin birində ona tədqiq etdiyi diyara təcili ezamiyyətə yollanmaq imkanı verilir.

Lakin səfər tarixi şərq əlbəyaxa döyüşləri üzrə məşqçi olan sevgilisi Kostya ilə tanışlıqlarının ildönümünə təsadüf edir. Kostya ona evlilik təklifi etməyə hazırlaşsa da, Vika fürsəti əldən verməmək üçün bir neçə günə qayıdacağına söz verib yola çıxır. Əcəhara çatan Vika burada neft maqnatının varisi Məqsudla tanış olur. Nişanlı olmasına baxmayaraq, Məqsud uşaqlıqda eşitdiyi və şimaldan gələcək sarışın qız haqqında olan öncəgörməni unuda bilmir.

«Şimal şahzadəsi» («Принцесса с севера») melodram serialı 2015-ci ildə Rusiyada çəkilib. Ekran işinin rejissorları Vladimir Zaykin və Marina Süleymanovadır, baş rolları isə Polina Maksimova, Aleksey Nesterenko, Roman Kurtsın və Vasili Şemyakinski canlandırıb.