Möcüzə

Gənc Li So Rin K-pop ulduzu olmağı arzulayır və məşhur müğənni Luisin yaradıcılığına heyranlıq duyur. Lakin baş verən yol qəzası onun səhnə planlarını alt-üst edir. Nəticədə qız əyləncə agentliyində məzmun yaradıcısı kimi fəaliyyətə başlayır. Vaxtilə onun təşviqi ilə dinləmələrə qatılan yaxın dostu Min Si U isə yeni N/S qrupunun tərkibində uğurla debüt edir.

Yeni musiqi qrupunun yüksəlişi rəqabətdən ehtiyat edən Luisin narahatlığına səbəb olur. Tezliklə adı qalmaqala qarışan dünya ulduzu karyerasında ciddi böhran yaşayır. Beləliklə, şou-biznesin pərdəarxasında hər üç gəncin yolları gözlənilmədən kəsişir.

Cənubi Koreya istehsalı olan «Mirakeul» melodram serialı 2022-ci ildə rejissor Myon Hyon-u tərəfindən çəkilib. Romantik layihədə baş rolları Kan Çxan-xi, Kan Min-a, Hviyon və O So-hyon canlandırır.