Yeganə günahım

Böyük balıqçılıq təsərrüfatına rəhbərlik edən Pyotr Çernyayev həm işdə, həm də ailədə hər şeyi sərt nəzarətdə saxlayır. Onun çətin xarakteri səbəbindən iki evliliyi də uğursuzluqla nəticələnib. Keçmiş həyat yoldaşlarından ayrılandan sonra o, iki oğlunu təkbaşına böyüdüb. Böyük oğlu Andrey rəssamlıq yolunu seçib, kiçik oğlu Saşa isə ailə biznesində atasına kömək etməyə başlayıb.

Bu ailənin sakit nizamı evə Marina adlı gənc qadının gəlişi ilə tamamilə pozulur. Həyatında xeyli çətinliklər yaşamış Marina çarəsizlikdən Pyotrla evlənməyə razılıq verir və hisslərinin olmadığını gizlətmir. Təsərrüfat rəhbəri gözlənilmədən onunla ailə qurur. Əvvəlcə gənc ögey anasını soyuq qarşılayan Saşa isə bir müddət sonra Marinaya qarşı qəlbində güclü hisslər yarandığını dərk edir.

«Yeganə günahım» («Единственный мой грех») adlı melodram serialı 2012-ci ildə Rusiya və Ukrayna istehsalı kimi işıq üzü görüb. Ekran əsərinin quruluşçu rejissoru Karine Foliyantsdır. Əsas rolları Lyubomiras Lautsyaviçyus, Andrey Torxov, Denis Vasilyev və Yelena Kalinina canlandırıb.