Undina

Varlı iş adamı Andrey Taranov dincəlmək üçün sakit dənizkənarı qəsəbəyə üz tutur. Səfərdə onu qeyri-rəsmi nikahda olduğu Yelizaveta Qladyeva və onun oğlu Maksim müşayiət edir. On beş ildir həm şəxsi həyatı, həm də işi bölüşən Yelizaveta bu tətilin rəsmi nikahla nəticələnəcəyini düşünür. Sahildə ev kirayələyən ailə ilk gündən yerli delfinariyada nümayiş olunan şouya baxmağa yollanır.

Çıxış zamanı Andreyin nəzərini gənc delfin təlimçisi Alyona cəlb edir; qızın siması ona iyirmi il əvvəl itirdiyi sevgilisini xatırladır. Qızla yaxından tanış olmaq qərarına gələn iş adamı qısa müddətdə onunla dostlaşır. Alyonanın anası bu yaxınlaşmadan narahatlıq keçirir və qız şübhələri dağıtmaq üçün anasını Andrey ilə görüşdürür. Lakin bu ilk görüş hər ikisinin bir-birini çoxdan tanıdığını üzə çıxarır.

Rusiyanın iki mövsümdən ibarət «Undina» adlı melodram serialı 2003-cü ildə təqdim edilib. Ekran işinə Vadim Şmelyov və Rauf Kubayev rejissorluq edib. Əsas rolları Andrey Qradov, Alyona Xmelnitskaya, Qabriella Mariani və Olqa Sidorova canlandırıb.