Krallıq nirvanası

«He li hua ting» serialında vəliəhd şahzadə Xiao Dingquanın saraydakı mürəkkəb taleyi təsvir olunur. Kiçik yaşlarında anasını və bacısını itirən gənc hökmdar atasının sevgisinə möhtacdır, lakin imperator ona qarşı soyuq və şübhə ilə yanaşır. Dövlət başçısı şahzadənin dayısı general Qunun hərbi gücündən ehtiyatlanır. Eyni zamanda taxta can atan böyük qardaş nüfuzlu qayınatası olan baş vəzirlə birləşərək şahzadəyə qarşı gizli planlar qurur.

Şahzadənin mövqeyini gücləndirmək istəyən ustadı onu dürüst məmur Lu Yinin ailəsi ilə tanış edir. Tezliklə Lu Yinin qızı Lu Wenxi ilə Dingquan arasında qarşılıqlı bağlılıq yaranır. Lakin qızın atası və qardaşı haqsız yerə şərlənərək tələyə salınır. Ailəsini xilas etmək və əsl həqiqəti üzə çıxarmaq üçün Wenxi kimliyini gizlədərək saraya qulluqçu kimi daxil olur.

Tarixi melodram janrında çəkilən ekran əsərinin rejissoru Yang Wenjundur. Əsas rolları Luo Jin, Li Yitong, Huang Zhizhong və Zhang Zhijian canlandırıblar. 2019-cu ildə yayımlanan Çin istehsalı layihə iki mövsümdən ibarətdir.