Ishq Aaj Kal

İyirmi dörd yaşlı Aliyə Cəfri təcrübə keçmək bəhanəsi ilə Manalidə yerləşən bir oteldə işə düzəlir. Əslində isə gənc qızın fərqli niyyəti var: o, anasının müəmmalı ölümünün əsl səbəbini aşkar etmək və cinayətdə ittiham olunan atasının sonrakı taleyini öyrənmək istəyir. Təcrübəçilər qrupuna rəhbərliyi Ərşad Əli Xan həyata keçirir.

Aliyənin iş yoldaşları arasında ona diqqət yetirən Fəraz Şeyx adlı bir gənc də peyda olur. Lakin Fərazın da gizlətdiyi şəxsi məqsədləri mövcuddur; o, Aliyənin mərhum anası ilə eşq macərasında adı hallanan atasının nüfuzunu təmizə çıxarmaq niyyətindədir. İki ailənin keçmişinə dair sirlər və tərəflər arasındakı inamsızlıq «Ishq Aaj Kal» serialının personajlarını kəskin qarşıdurmalarla üz-üzə qoyur.

2019-cu ildə Hindistanda istehsal olunmuş melodram və triller janrlı layihənin rejissoru Niteş Sinqhdir. Ekran əsəri dörd mövsümdən ibarətdir. Baş rolları Roşmi Banik, Kavita Qhay, Anqad Həsica və Paras Kalnavat canlandırıblar.