Çöl çiçəkləri dəstəsi

Kənd müəlliməsi Anna qardaşının borclarını ödəmək üçün paytaxta yollanır və varlı iş adamı Vorontsovun körpəsinə dayəlik etməyə başlayır. Ev sahibi gənc qadına qarşı əxlaqsız hərəkətlər edir və rədd cavabı aldıqda ona təcavüz edir. İşi tərk etmək istəyən Anna bu dəfə sahibkarın xanımı Kseniyanın şər-böhtanı ilə üzləşir və oğurluqda ittiham olunaraq həbs edilir.

Ədalət axtaran Anna polisə təcavüzlə bağlı şikayət ərizəsi yazsa da, həbsdən çıxmaq naminə ittihamını geri götürməyə məcbur qalır və ata evinə qayıdır. Baş verənlərdən xəbər tutan qardaşı Nikolay intiqam almağa qərar verir. O, cinayətkarlarla birləşərək Vorontsovun oğlunu qaçırmaq istəyir, lakin körpənin əvəzinə iş adamının böyük oğlu, tanınmış skripkaçı Mark girov götürülür.

«Çöl çiçəkləri dəstəsi» adlı Rusiya melodram serialı rejissor Andrey Selivanov tərəfindən lentə alınıb. 2024-cü il istehsalı olan layihədə Darya Anişina, İlya Deniskin, Aleksandr Yatsko və Nikita Lubenko çəkiliblər.