Taisiya

Yetim qalan gənc Taisiya sıx meşələrin əhatəsində, şəhərdən uzaq düşmüş kiçik bir kənddə yaşayır. Burada demək olar ki, sakin qalmayıb, mobil şəbəkə tutmur, ən yaxın şəhərə aparan tək yolu isə vaxtaşırı yağış suları yuyub aparır. Qızın dərdini bölüşə bildiyi yeganə insan yaşlı qonşusu Vasilisadır.

Həbsxanadan təzəcə çıxmış yerli xuliqan və brakonyer Vadim inadla Taisiyanın arxasınca düşür. Qızın ona heç bir rəğbəti olmasa da, bu ucqar məkanda onu bu arzuolunmaz münasibətdən qoruyacaq kimsə yoxdur. Vasilisanın istedadlı rəssam olan qardaşı oğlu Sergey kəndə gəldikdən sonra Taisiyanın həyatında yeni hadisələr cərəyan etməyə başlayır.

«Taisiya» melodram serialı 2018-ci ildə Ukraynada istehsal olunub. Ekran əsərinin quruluşçu rejissoru Valeri İbrahimovdur. Baş rolları Yevgeniya Noxrina, Dmitri Belyakin, Aleksey Zubkov və Anna Kazyuçiç canlandırıblar.