Ürək marafonu

Gələcəyin həkimi və böyük əczaçılıq şirkəti sahibinin qızı Nastya Lisitsınanın həyatı gözlənilmədən alt-üst olur. Nişanlısı ilə mübahisə etdikdən sonra sükan arxasına əyləşən gənc qız yolda triatlonçu Dmitri Kovalyovu vurur. Qorxuya düşən Nastya qəza yerindən qaçsa da, vicdan əzabı onu rahat buraxmır.

Səhvini düzəltmək istəyən qız Dmitrinin müalicə aldığı xəstəxanada həkim kimi fəaliyyətə başlayır. O, idmançının tezliklə sağalması naminə bütün imkanlarını səfərbər edərək xüsusi palata və tapılmayan dərmanları təmin edir. Lakin keçmiş nişanlısı baş vermiş hadisənin təfərrüatlarını öyrənir və Nastya ilə onun atasını şantaj etməyə cəhd göstərir.

«Ürək marafonu» adlı serial rejissor Vyaçeslav Lavrov tərəfindən ekranlaşdırılıb. 2026-cı il istehsalı olan bu Rusiya melodramında əsas obrazları Darya Kukarskix, Anton Kutınov, Aleksandr Quryev və Vladislav Reznik canlandırır.