Zərif sap

Nastya cərrah işləyən nişanlısı İlya ilə xoşbəxt günlər keçirir. Onların münasibətində yeganə problem Nastyanın atası Mixail Petroviçin bu evliliyə qarşı çıxmasıdır. İş adamı olan ata qızını imkanlı dostlarının oğlu Sergeyə ərə vermək niyyətindədir. Nastya isə uzun müddətdir ona aşiq olan Sergeyin İlyanı aradan götürmək üçün məqam axtardığını ağlına belə gətirmir.

Əməliyyat vaxtı baş verən gözlənilməz hadisə Sergeyin planları üçün əlverişli fürsət yaradır. Onun qurduğu tələ nəticəsində İlya xəstəxanadan uzaqlaşdırılır. Nastya ilə aralarında yaranan mübahisədən və düşdüyü sarsıntıdan sonra həkim başqa şəhərə işləməyə gedir. Sergey isə tək qalan qızın diqqətini çəkmək və onun etimadını qazanmaq üçün hər vasitəyə əl atır.

2025-ci ildə çəkilmiş Rusiyanın «Zərif sap» serialına rejissor Vyaçeslav Lavrov quruluş verib. Melodram janrlı ekran əsərində baş rolları Olqa Arntqolts, İlya Alekseyev, Rodion Vyuşkin və Aleksandr Peskov canlandırıblar.