Xaos agentləri

«Agents of Chaos» sənədli serialı 2016-cı ildə ABŞ-da baş tutan prezident seçkiləri ərəfəsindəki kiber və informasiya müdaxilələrini araşdırır. Hadisələr 2010-cu illərin əvvəllərində «İnternet Araşdırmaları Agentliyi» və digər troll fabriklərinin fəaliyyətə başlaması ilə açılır. Ekran əsəri dezinformasiya yaymaq və ictimai qarşıdurmalar yaratmaq üçün sınaqdan keçirilən üsulların ilk dövrlərini işıqlandırır.

Araşdırma bu metodların Amerika mühitinə daşınmasını və Demokratlar Partiyasının Milli Komitəsinin serverlərinə edilən haker hücumlarını mərhələli şəkildə izləyir. Eyni zamanda müəlliflər manipulyasiyalara şərait yaradan zəif nöqtələri və siyasi sistemdəki boşluqları diqqətə çatdırırlar.

İki hissədən ibarət ABŞ istehsalı layihə 2020-ci ildə nümayiş olunub. Sənədli filmin rejissorları Aleks Qibni və Xavyer Alberto Boterodur, layihədə Con Podesta, Marqarita Simonyan və Harri Reyd kimi şəxslərin çıxışları yer alır.