Heç Kim Olanlar...

Hadisələr inqilabdan əvvəlki Düşənbədə cərəyan edir. Şakir adlı gənc və yoxsul oğlan özünə bir sənət və həyat yolu axtarır, eyni zamanda mövcud dini ehkamları şübhə altına alır. Baş müftinin onun gələcəkdə böyük bir sərkərdə olacağı barədə dediyi kəlamdan sonra yerli zadəganlar Şakiri gizlicə aradan götürmək qərarına gəlirlər.

Qurulmuş plandan xəbəri olmayan Şakir daha yaxşı bir güzəran tapmaq məqsədilə doğma yurdunu tərk edir. Şəhərə isə xarici qaçaqmalçılar ayaq basır. Gənc yol boyu özü kimi əzilən insanlarla və yeni bir quruluş uğrunda mübarizəyə başlayan rus inqilabçıları ilə rastlaşır.

«Кто был ничем...» tarixi serialı 1974-cü ildə SSRİ-də rejissor Tahir Sabirov tərəfindən lentə alınıb. Baş rolları Xocadurdu Narlıyev, Anatoli Barçuk, Akmurad Byaşimov və Gülsara Abdullayeva canlandırıblar.