Alovlu mələk

On bir il əvvəl baş verən avtomobil qəzası Yeva Zarinskayanın yaddaşını tamamilə silib. Qadın öz keçmişi haqqında yalnız əri Dmitrinin danışdıqlarından xəbərdardır. Uzun illər xaricdə yaşadıqdan sonra ər-arvad vətənə qayıtmaq qərarına gəlirlər.

Evə döndükdən sonra Yevanı qəribə yuxular və naməlum xatirələr narahat etməyə başlayır, bu xəyallarda isə balaca bir qız obrazı üzə çıxır. Əri onların heç vaxt uşağı olmadığını bildirsə də, Yeva artıq onun sözlərinə inana bilmir. İllərdir bir yerdə yaşadığı insanın əsl kimliyini anlamağa və keçmişini xatırlamağa çalışan qadın şəxsi araşdırmaya başlayır və bu axtarışlar onun həyatı üçün təhlükə yaradır.

Rusiyanın 2018-ci il istehsalı olan «Alovlu mələk» triller serialı rejissor Darya Semyonova tərəfindən çəkilib. Layihədə əsas rolları Polina Filonenko, Alyona Savastova, Stepan Beketov və Kirill Zaporojtski ifa ediblər.