Qara göl

«Svartsjön» serialı zəngin ailədən olan Yuhanın planları ilə başlayır. Gənc oğlan uzun illərdir fəaliyyət göstərməyən xizək mərkəzini almaq niyyətinə düşür. Bu məkan iyirmi il əvvəl bütöv bir ailənin sirli şəkildə həlak olmasından sonra qapılarını bağlamışdı. Yuhan oranı yerindəcə yoxlamaq üçün sevgilisi Hanne və yaxın dostları ilə birlikdə yola çıxır.

İlk günlər qış əyləncələri, ziyafətlər və dincəlməklə keçsə də, çox keçmədən məkanda izahı tapılmayan qorxunc hadisələr baş qaldırır. Sirli olaylar yoldaşlar arasında şübhələri artırır və münasibətləri gərginləşdirir. Üstəlik, qəfil başlayan kəskin şaxtalar dostların arasındakı anlaşılmazlığı və ayrılığı daha da dərinləşdirir.

İsveç, Danimarka və Norveç istehsalı olan qorxu və triller serialı 2016-cı ildə yayımlanıb və 2 mövsümdən ibarətdir. Ekran əsərinin quruluşçu rejissorları David Berron və Conatan Sjöberqdir. Əsas rolları Filip Berq, Valter Skarsqard, Anna Oström və Sara-Sofi Bussnina canlandırıblar.