Soyuq sahillər

Ozersk şəhərində gənc qadınları boğaraq qətlə yetirən qatilin peyda olması sakinləri qorxu içində saxlayır. Həyat yoldaşı ilə mübahisədən sonra zəngin varis Mariya Voronsova yoxa çıxır. Yerli polis rəisi Boris Novinski bu işi yenicə fəaliyyətə başlayan müstəntiq qızı Alinaya tapşırır. Mariyanın axtarışları heç bir nəticə verməsə də, bu hadisə Alinanı onun əri Markla yaxınlaşdırır.

Dörd ildən sonra onların qurduğu sakit həyat gözlənilmədən pozulur. İşgüzar səfərdə olan Mark itkin düşmüş keçmiş xanımına həddindən artıq bənzəyən bir qadınla qarşılaşır və Alinanı tərk edir. Eyni zamanda Ozerskdə illər öncəki dəsti-xətlə yeni qətllər törədilməyə başlayır. Alina yenidən xidmətə qayıdaraq həmin silsilə cinayətlərin izinə düşür və qeyri-adi sirlərlə üzləşir.

Triller janrında çəkilən «Soyuq sahillər» serialının quruluşçu rejissoru Sergey Komarovdur. Rusiya istehsalı olan bu layihə iki mövsümdən ibarətdir və 2019-cu ildə işıq üzü görüb. Baş rolları Yekaterina Vilkova, Kirill Safonov, Aleksandr Qorbatov və Anastasiya Mikulçina canlandırıb.