Mamuka Kikaleyşvili

Doğum tarixi

10 avqust 1960 · Şir

Ölüm tarixi

3 may 2000 (39 yaş)

Doğum yeri

Tbilisi

Mamuka Kikaleyşvili — parlaq komediya və dramatik rolları ilə tanınan sovet, gürcü və rus teatr və kino aktyoru, həmçinin kinorejissordur. O, 10 avqust 1960-cı ildə Tbilisidə sənətçi ailəsində dünyaya gəlib. Anası Leyla Dziqraşvili Rustaveli adına teatrın aktrisası və Gürcüstan SSR-in əməkdar artisti, atası Andrey Kikaleyşvili isə həmin teatrın direktor müavini olub. 1981-ci ildə Rustaveli adına Tbilisi Teatr İnstitutunun aktyorluq fakültəsini bitirən sənətçi 1984-cü ilə qədər Tbilisi Maricanişvili adına Teatrda çalışmış, ardınca «Gürcüstan-film» kinostudiyasında fəaliyyətini davam etdirmişdir. Aktyor ən böyük şöhrətini azərbaycanlı rejissor Vaqif Mustafayevin «Yaramaz» filmindəki ifası ilə qazanmış və 1991-ci ildə Azərbaycan SSR Dövlət mükafatına layiq görülmüşdür. 1988-ci ildə isə o, Qabrovo Beynəlxalq Kinofestivalında ən yaxşı komediya aktyoru mükafatını alıb. Mamuka Kikaleyşvili filmləri tamaşaçılar tərəfindən hər zaman rəğbətlə qarşılanıb. Onun yaddaqalan ekran işlərindən biri 1990-cı ildə çəkilmiş «Passport» filmindəki Moişa Sepiaşvili obrazıdır. 1994-cü ildə Levon Uzunyanla birgə «Düşmüş mələk» filmini çəkərək rejissorluqda da debüt etmişdir. Gürcüstandakı zviadizm ideyalarını qəbul etmədiyi üçün Moskvaya köçən aktyor Gürcüstanın Rusiyadakı səfirliyində mədəniyyət attaşesi və Nikolay Ozerov adına İctimai Fondun himayəçilik şurasının üzvü kimi çalışıb. Ömrünün son illərində aktyor «U Mamuki» adlı şəxsi televiziya şousu üzərində işləyirdi. 26 aprel 2000-ci ildə yuxu dərmanının həddindən artıq dozasından komaya düşən sənətçi 3 may 2000-ci ildə Moskvada vəfat etmiş və Tbilisidəki Vake qəbiristanlığında dəfn olunmuşdur.