Bad Vegan: Şöhrət, fırıldaq və qaçış

Pure Food and Wine adlı Nyu-York restoranı tanınmış simaların ən sevimli məkanlarından biri idi. Bu uğurlu layihənin başında isə şəhərin məşhur simalarından sayılan Sarma Melngailis dayanırdı. Lakin internetdə özünü Şeyn Foks kimi təqdim edən bir şəxslə tanışlıq onun həyatının axarını dəyişdi. Həmin şəxs əslində Antoni Stranqis adlı bir fırıldaqçı idi və tezliklə Sarma onunla ailə həyatı qurdu.

Yeni ər qadını psixoloji cəhətdən təsir altına salaraq ona ağlasığmaz vədlər verməyə başladı. O, restoran şəbəkəsini genişləndirəcəyini və hətta Sarmanın sevimli itinə əbədi ömür bəxş edəcəyini iddia edirdi. Bu cəfəngiyatlara inanan restoran sahibi öz biznesinin hesablarından gizlicə böyük məbləğlər çıxararaq ərinin ixtiyarına verdi. «Bad Vegan: Fame. Fraud. Fugitives» adlı sənədli TV-şou nüfuzlu bir iş qadınının qanundan qaçan cinayətkara çevrilməsinin təfərrüatlarını araşdırır.

Layihənin rejissoru amerikalı sənədli film ustası Kris Smitdir. Çəkilişlərdə Sarma Melngailis ilə yanaşı Allen Salkin, Ilze Melngailis və Bonni Kroker də iştirak ediblər. Əsl cinayət hadisələrindən bəhs edən bu mini-serial 2022-ci ildə ABŞ-də təqdim olunub.