Təkbuynuz Niko

On üç yaşlı Billi atasının avtomobil qəzasında həlak olmasından sonra ayağındakı xəsarət səbəbindən xüsusi metal kəmər taxmaq məcburiyyətində qalır. Anası ilə yeni şəhərə köçən yeniyetmə burada həmyaşıdlarının lağlağıları ilə qarşılaşır və tənhalıqdan əziyyət çəkir. Lakin alnında kiçik buynuzu olan və çox sürətlə böyüyən Niko adlı qeyri-adi dayça onun yeganə və sədaqətli dostuna çevrilir.

Billi bu heyvanın nağıllardakı möcüzəvi təkbuynuz olduğuna ürəkdən inanır. Çox keçmir ki, qəribə canlının xəbəri mətbuatda və televiziyada yayılaraq geniş diqqət çəkir. Dostunu pis niyyətli adamlardan qorumaq istəyən Billi, təkbuynuzların yaşadığı və bütün dərdlərin sağaldığı əfsanəvi Cənnət bağını tapmaq üçün Niko ilə birgə dağlara üz tutur.

ABŞ və Kanada istehsalı olan «Nico the Unicorn» macəra filmi rejissor Qrem Kempbell tərəfindən lentə alınıb. 1998-ci ildə nümayiş olunan layihənin baş rollarında Melissa Pirrera, Çarlz S. Duse, İen MakDonald və Larri Dey çıxış edirlər.