Beş uşaq və sehr

Hadisələr Birinci Dünya müharibəsi dövründə cərəyan edir. Pilot olan ata cəbhəyə yollanır, ana isə hospitalda yaralılara kömək etməyə gedir. Valideynlərindən ayrı düşən Siril, Robert, Anteya, Ceyn və Quzu ləqəbli ən balaca qardaş əmilərinin malikanəsinə göndərilir. Ev işlərinə baxan qadın ilk gündən uşaqlara bir sıra qadağalar qoyur və xüsusilə bir qapını açmağı qətiyyətlə qadağan edir.

Bacı və qardaşlar bu xəbərdarlığa məhəl qoymayıb sirli qapını açır və sehrli şəkildə kimsəsiz dəniz sahilinə düşürlər. Burada onlar özünü Qum Pərisi adlandıran səkkiz min yaşlı qəribə bir varlıqla qarşılaşırlar. Bu məxluq gün ərzində uşaqların yalnız bir arzusunu yerinə yetirə bildiyini bildirir.

«Five Children and It» macəra filmi 2004-cü ildə Böyük Britaniya, ABŞ və Fransanın birgə istehsalı ilə çəkilib. Rejissor Con Stefensonun lentə aldığı ekran əsərində baş rolları Tara Fitscerald, Kim Fenton, Norman Uisdom və Con Seşns canlandırıb.