Norman Uizdom

Doğum tarixi

4 fevral 1915 · Dolça

Ölüm tarixi

4 oktyabr 2010 (95 yaş)

Doğum yeri

Marlibon, Böyük Britaniya

Norman Uizdom — cənab Pitkin obrazı ilə dünya şöhrəti qazanmış Böyük Britaniya aktyoru və ssenaristidir. O, 4 fevral 1915-ci ildə Londonda anadan olmuşdur. Uşaqlıq illəri çətinliklərlə keçən Norman doqquz yaşında ailə münaqişəsi səbəbindən küçələrə düşmüş, bir müddət qəyyumların yanında yaşamışdır. Daha sonra gəmidə qulluqçu, şaxtaçı və qapıçı işləyən Uizdom, on beş yaşında hərbi orkestrdə təbilçi kimi xidmətə başlamışdır. Alayla birlikdə Hindistana göndərilən gənc orada klarnet və trubada ifa etməyi öyrənmiş, eyni zamanda Britaniya ordusunun boks üzrə çempionu olmuşdur. Sənətçinin peşəkar bioqrafiyası 1946-cı ildə müzik-holl və vodevillərlə başlamış, qısa müddətdə televiziya verilişlərinə yol açmışdır. ABŞ-da televiziya layihələrində çıxış etdikdən sonra, 1948-ci ildə «A Date with a Dream» filmi ilə böyük ekranda debüt etmişdir. 1953-cü ildə «Trouble in Store» filmi üçün məşhur mahnısını bəstələmişdir. Norman Uizdomun iştirakı ilə filmlər və seriallar tamaşaçılar tərəfindən rəğbətlə qarşılanmışdır; o, xüsusilə «The Square Peg» (1958) filmində həm ssenarist, həm də əsas rolların ifaçısı kimi böyük uğur qazanmışdır. Onun yaratdığı sadəlövh cənab Pitkin obrazı dörd ekran əsərində yer almışdır. Çarli Çaplinin ən sevimli klounu hesab etdiyi aktyor pantomima və ekssentrik komediya ənənələrini qoruyub saxlamışdır. Ömrünün son illərinə qədər qastrollarda olan Uizdom, hətta doxsan yaşında «Twisted Angels» pank qrupunun klipində çəkilmişdir. O, səhnə və televiziya fəaliyyətini 4 oktyabr 2010-cu ildə vəfat etməzdən cəmi altı ay əvvəl dayandırmışdır.