Cekpot

Amerikalı zəngin bir qadın qocalıqla barışmaq istəmir və cavanlıq iksirinin hazırlanması üçün aparılan tədqiqatlara külli miqdarda vəsait ayırır. Alim qarşıya qoyulan məqsədə nail olsa da, mürəkkəb genetik sınaqlarda istedadlı uşaqların iştirakı və gözlənilməz yan təsirlər prosesi xeyli çətinləşdirir.

Mülkə yeni bağbanın gəlişi ilə hadisələr tamamilə fərqli istiqamət alır. Sadə işçi təsadüf nəticəsində özünü professor kimi təqdim etmək məcburiyyətində qalır. O, gənc dahilərə dərs deməli və cavanlaşma üzrə təcrübələrin gedişatına birbaşa rəhbərlik etməlidir.

1992-ci ildə ekranlara çıxan «Jackpot» ailəvi fantastik komediyası İtaliya və Fransa kinematoqrafçılarının birgə işidir. Rejissoru Mario Orfini olan filmin baş rollarında Adriano Çelentano, Keyt Vernon və Kerrol Beyker çəkiliblər.