Sola, sağa

Restoranlarda çıxış edərək pul qazanan skripkaçı Con Lyu sevdiyi əsərləri ancaq parkdakı göyərçinlər üçün ifa edir. Tərcüməçi İvi Çoy da sevmədiyi ucuz kitabları çevirməklə məşğuldur və sevimli sətirlərini yalnız küçədə rast gəldiyi pişiyə oxuya bilir. Hər ikisi böyük şəhərdə öz tənhalığını yaşayır.

Onlar eyni binada, aralarında bircə divar olan mənzillərdə qalsalar da, heç vaxt üz-üzə gəlmirlər. Çünki oğlan blokdan çıxanda hər dəfə sağa, qız isə sola dönür. Gözlənilməz bir təsadüf nəticəsində rastlaşan qəhrəmanlar hələ on üç il əvvəl tanış olduqlarını anlayırlar. Birlikdə tapdıqları sevinc uzun çəkmir və yeni bir bədbəxt təsadüf onları yenidən bir-birindən ayırır.

«Sola, sağa» filmi 2003-cü ildə rejissorlar Conni To və Vay Ka-Fay tərəfindən çəkilib. Honkonq və Sinqapur istehsalı olan bu melodramda baş rolları Takeşi Kaneşiro ilə Cici Lyun canlandırıb.