Hounddog

1950-ci illərin sonunda Alabama kəndlərinin birində balaca Luellen böyüyür. Qızcığaz dindar və sərt nənəsinin yanında qalsa da, gününün çoxunu sevimli atasının köhnə daxmasında keçirir. İstedadlı Luellen daxili hirsini və kədərini büruzə vermək, eləcə də sakitlik tapmaq üçün Elvis Preslinin mahnılarına sığınır.

Şəhərə konsert verməyə gələn Elvisin çıxışına getmək onun ən böyük arzusuna çevrilir, lakin bilet almağa pulu çatmır. Yaxın dostu Baddi hiyləyə əl ataraq, bilet müqabilində onu kumiri kimi oxuyub rəqs etməyə məcbur edir. Bu ifa zamanı baş verən dəhşətli hadisə qızı dərin depressiyaya salır və qonşusu Çarlz blüz musiqisinin köməyilə uşağın qəlbini sağaltmağa çalışır.

Rejissor Debora Kampmeyerin çəkdiyi «Hounddog» musiqili dram filmi 2007-ci ildə ABŞ-da istehsal olunub. Əsas rollarda Dakota Fanninq, Payper Lori, Devid Mors və Robin Rayt çıxış ediblər.