Sissi

Bavariya hersoqu Maksin gənc qızı Sissi səs-küylü saray əyləncələrindən uzaq durmağa çalışır. O, təbiət qoynunda vaxt keçirməyi və heyvanlara qulluq etməyi sevir. Meşədə təsadüfən gənc bir zabitlə tanış olan qız ona aşiq olur. Zabit isə Sissini sadə kəndli qızı hesab etsə də, ona qarşı eyni hissləri bəsləməyə başlayır.

Tezliklə möhtəşəm balda onların həqiqi kimliyi üzə çıxır: meşədəki zabit əslində Avstriya imperatoru Frans-İosif, qız isə hersoq qızıdır. Lakin imperatorun anası hersoginya Sofi artıq oğlu üçün başqa namizəd seçib və bu namizəd Sissinin böyük bacısı Yelenadır. Bütün bu maneələrə baxmayaraq, Frans-İosif ilk dəfə anasının iradəsinə qarşı çıxaraq Sissini seçmək qərarına gəlir.

1955-ci ildə çəkilmiş «Sissi» filmi məşhur trilogiyanın ilk hissəsidir. Avstriya istehsalı olan bu tarixi ekran əsərinin rejissoru Ernst Marişkadır, baş rolları isə Romi Şnayder, Karlhaynts Böm, Maqda Şnayder və Uta Frants canlandırıblar.