Yağış

Xolera təhlükəsi səbəbindən gəmi gözlənilmədən Samoa adasında yerləşən Paqo-Paqo kəndinin sahilində dayanmalı olur. Sahilə düşən sərnişinlər arasında həkim Robert Makfeyl və xanımı, fanatik dindar Alfred Devidson həyat yoldaşı ilə birlikdə və rahat həyat tərzi sürən Sedi Tompson var. Sakit kənd mühiti bir-birinə tamamilə zidd olan bu insanların gəlişi ilə dəyişir.

Adada vaxt itirməyən Sedi burada xidmət edən amerikalı əsgərlərlə əyləncələr təşkil etməyə başlayır. Bu sərbəst hərəkətlər həkimin və missionerin xanımlarını bərk hiddətləndirir və onların sərt qınağına səbəb olur. Sərt dini inancları olan Devidson isə gənc qadının bu davranışını bir sınaq kimi qəbul edərək onun ruhunu xilas etməyə və onu düz yola gətirməyə çalışır.

ABŞ istehsalı olan «Yağış» (Rain) dram filmi 1932-ci ildə rejissor Lyuis Maylstoun tərəfindən çəkilib. Ekran əsərində baş rolları Coan Krouford və Uolter Hyuston canlandırıb. Həmçinin heyətdə Fred Hovard və kiçik Ben Hendriks kimi aktyorlar yer alıb.